"Kabeureuyan Heureuy"

"Kabeureuyan Heureuy"

Ku: Hendi Rustandi (Pasapon di Paud At-Taqwa Desa Bojongmalaka)

Kacaturkeun dina hiji riwayat, mangsa rombongan para sahabat ngaleut ngajug-jug ka médan perang Tabuk, dina éta rombongan aya hiji jalma nyarita, pokna: “Ceuk kuringmah Rosululloh jeung Sahabatna anu sok maraca al-Quran téh taya lian ukur jalma anu baluncir beuteungna, tukang wadul jeung ipis burih mun adu hareupan jeung musuh”.

Mireungeuh babasan éta, Auf bin Malik radhiyallahu 'anhu némpas bari pokna; “Anjeun anu wadul mah, ku ngomong kitu saenyana anjeun geus jadi jalma munapék, omongan anjeun rék dibéjakeun ku Kuring ka Rosululloh”, saur Auf bin Malik bari kencling indit maksadna badé ngadeuheus ka Rosululloh.

Saméméh Auf bin Malik dugi ka payuneun Rosululloh, rupina Alloh Subhanahu Wata’ala parantos langkung tipayun ngalungsurkeun wahyu ngeunaan kajadian éta. Jalma anu ngageuhgeuykeun Rosululloh tadi kacida reuwasna, tuluy tibabaranting rék nepangan Rosululloh maksudna seja tamada.

Saamprokna sareng Rosululloh anu parantos tunggang onta, éta jalma sasadu, pokna” Nun Gusti Rosul abdi neda dihapunten, teu pisan-pisan abdi nyacampah salira, etamah saukur heureuy tamba kesel di perjalanan”.

Numutkeun Ibnu Umar, salasawios sahabat Rosululloh anu ngiring kana rombongan, jalma éta nyarita kituna téh bari tipepereket muntang pageuh kana tali pelana onta Rosululloh, geus teu tolih sukuna titatarajong kana batu nepi ka garetihan, bari ceurik balilihan kalawan terus sasadu ménta pangampura.

Ninggal peta eta jalma, Rosululloh dadawuh ngaoskeun Surat At-Taubah ayat 65-66:

“...Naha ka Alloh, kana  ayat-ayat-Na katut ka Rosul-Na anjeun ngageuhgeuykeun? Anjeun teu kudu ménta hampura, lantaran ku kitu anjeun geus kapir sanggeus anjeun iman...”

Anjeunna (Rosululloh) teu mindo dawuh deui, kajabi ngaoskeun éta ayat, bari teu ngareret-reret acan ka éta jalma. (HR.Ibnu Abi Hatim kalayan sanadna hasan).

Naon hubungan nana kisah ieu jeun puisi Ibu Sukmawati? Ah...teu aya hubung-kaitna. Itung-itu milu nalangsa we, pedah tina lenger sok aya balukar nu matak peuheur.

Wallahu'alam.

Posted in: